كشف حسام غالي، عضو مجلس إدارة النادي الأهلي، عن أول قرار سيتخذه لو أصبح رئيسًا للقلعة الحمراء.
وقال غالي في إذاعية: “أول حاجة هعملها لو بقيت رئيس النادي الأهلي، هختار ناس حواليا بشخصية النادي الأهلي، ناس عندها إنكار ذات، ناس عندها طموح، ناس تحب تشتغل في عمل جماعي مش فردي، ناس مش متسلقة وشخصيتها قوية”.
وأضاف: “أنا أحب الناس اللي تشتغل معايا تكون شخصيتها قوية بس مش متسلقة، واللي هي أنا اللي بعمل أنا اللي موجود، إنت شخصيتك قوية وكل حاجة بس في الأخر العمل جماعي، نفسي الحاجات دي تبقى موجودة، هي كانت موجودة قبل كده”.
وتابع: “طول عمري ماسك سيف ودرع من وأنا صغير لحد ما بطلت كورة، أنا كنت بحارب الناس كلهاإعلاميين وجمهور ومدير فني مش واثق فيا، دايمًا كنت ماسك سيف ودرع وبحارب، ومخدتش استراحة المحارب، لأن بعد اعتزالي دخلت في العمل الإداري”.
وأكمل: “أنا عندي الرغبة أبقى رئيس الأهلي في يوم من الأيام، بس حاليًا مش قادر أمسك سيف ودرع وأدخل المعركة دي بعد ما شوفت وحاشة الموضوع وضخامة الموقف وتكالب بني آدمين كتير وصراعات كبيرة أوي إن هي تبقى في الحتة دي وعندها تطلعات أو عندها غرض تدي للشخص اللي الجمهور شايف أنه ممكن يبقى رئيس النادي ويحقق طموحاتهم، تديله بالكتف أو بخنجر”.
وواصل: “البعض يحاول تشويه صورتي لأن الجمهور شايف إني ممكن أبقى رئيس النادي الأهلي، أو يخلوا الانطباع اللي متاخد عني غلط (انتوا بتفكروا غلط ده مينفعش)”.
وأردف: “دايمًا في خناجر في الضهر بتتحط، أنا أقدر أحارب جدًا، بس هطلع حاجات سيئة جدًا، أنا مبعملش كده وعمري ما هحارب حروب غير شريفة وغير نزيهة، أنا دايمًا حربي شريفة وش في وش، أنا بمجهودي وعرقي هاخد اللي أنا عايزه”.
